മഴ വീഴുമ്പോള്‍...

ദേശാടനക്കിളികള്‍

ഇവയും
ഒരിനത്തില്‍പെട്ട
ദേശാടനക്കിളികള്‍...

മഴ വീഴുന്ന നാട്ടിലെ മരങ്ങളില്‍
കൂട് വെയ്ക്കാനോ
കായ്കനികള്‍
കൊത്തിയെടുക്കാനോ കഴിയാതെ
കടല്‍ കടന്നവ...

മരുഭൂമികളിലെ
വാതകക്കുഴലുകള്‍ക്കിടയിൽ ,
എണ്ണ സംഭരണികള്‍ക്കരികിൽ,
ആകാശം ലക്ഷ്യമാക്കിയുയരുന്ന
കെട്ടിടത്തിനു മുകളിൽ,
ഇവ
വവ്വാലുകളെ ഓര്‍മ്മിപ്പിച്ച്
തൂങ്ങിക്കിടക്കുന്നത്
കാണാം .

ഇവയും ഒരിനത്തില്‍ പെട്ട
ദേശാടനക്കിളികള്‍...

ചിറകുകള്‍
മെല്ലെ കൊഴിഞ്ഞു തുടങ്ങുമ്പോള്‍
കൊക്കിലൊന്നുമവശേഷിക്കാതെ
തിരിച്ചുപറക്കേണ്ടി വരുന്ന
ദേശാടനക്കിളികള്‍...