രക്തം..

മുറപ്പെണ്ണ് വയസ്സറിയിച്ച ,
അതേ രാത്രിയിലായിരുന്നു
അയാള്‍ ഒരു കൊലപാതകി ആയത്‌.
ഉറവെടുത്ത രണ്ടു രക്തത്തിനും
ശിക്ഷകള്‍ വ്യത്യസ്തമായിരുന്നു..

അവളുടെ
മനസ്സിലും ശരീരത്തിലും
വിലങ്ങു വീണപ്പോള്‍ ,
അയാളുടെ കൈകളില്‍ മാത്രം
വിലങ്ങു വീണു....

വേരറ്റു പോയത്....

നിത്യവും
തടം തുറന്നു
നനച്ചു വന്നതായിരുന്നു..
ഇമ വെട്ടാതെ ,
കൌതുകത്തോടെ
നോക്കിയിരുന്നതായിരുന്നു ..
ഒടുവില്‍ ,
മുളപൊട്ടാതിരുന്നപ്പോള്‍
വേര് വന്നോ എന്ന് നോക്കാന്‍
പിഴുതെടുത്ത്‌ പോയി..
അത് വര്‍ഷങ്ങള്‍ക്ക്‌ അപ്പുറമായിരുന്നു...

വേര് ഉണരാന്‍ തുടങ്ങിയ
നിമിഷത്തിലായിരുന്നു ,
പറിച്ചെറിഞ്ഞതെന്നു
വര്‍ഷങ്ങള്‍ക്കിപ്പുറം
അവളുടെ വെളിപ്പെടുത്തല്‍..

ഇപ്പോള്‍
വേരും നീരുമറ്റ് കിടക്കുന്ന
ഈ
അശാന്ത മൌനമാണ്
പ്രണയമെന്നു
കാലത്തിന്ടെ ഓര്‍മ്മപ്പെടുത്തല്‍ ...